ప్లాస్టిక్ ను తినే పురుగు

 

వ్యాక్స్ వామ్స్ అని పిలువబడే ఈ పురుగులు ప్లాస్టిక్ను తినేస్తాయి అని, దానిని ఒక ఉపయోగకరమైన రసాయనపదార్థంగా మార్చేస్తాయి అని అంటున్నారు.

ప్లాస్టిక్ త్వరగా నశించేది కాదని, మన ఇల్లైన భూగోళంపై భూమ్మీద, నీటిలోనూ గాలిలోనూ కూడా శతాబ్దాల తరబడి నిలిచిపోతుందని, అది పర్యావరణాన్ని దెబ్బ తీస్తుందని, మనుషులు, ఇతరజంతుజాలం దాని వలన క్రమంగా నశిస్తుందని శాస్త్రజ్ఞులు చెబుతూ వస్తున్నారు.  అయినప్పటికీ, వర్తమానమే తప్ప భవిష్యత్తు పట్ల బాధ్యత లేని మనుషులు ఆ మాటలను ఎంత మాత్రం పట్టించుకోకుండా ప్లాస్టిక్ ను వాడుతూనే ఉన్నారు.  అందువల్ల ప్లాస్టిక్ ను నిషేధించడమే సరైన చర్య అని ప్లాస్టిక్ వాడకానికి వ్యతిరేకంగా ప్రపంచమంతటా ఆందోళనలు జరుగుతున్నాయి. 

అయితే ప్లాస్టిక్ వ్యాపారులు మాత్రం ఇటువంటి ప్రచారాలు ఆందోళనలు తమ వ్యాపారాన్ని దెబ్బతీయడానికి మాత్రమే జరుగుతున్నాయని పోటీగా ఎదురు ప్రచారం చేస్తున్నారు.  ప్లాస్టిక్ సంచుల బదులు కాగితం సంచులు వాడితే వాటి కోసం చెట్లను పెద్ద ఎత్తున నరకవలసి ఉంటుందని, దానివల్ల మాత్రం పర్యావరణం దెబ్బతినదా అని ప్రశ్నిస్తున్నారు.  ప్లాస్టిక్ కు ప్రత్యామ్నాయంగా గాజును వాడితే ఆ గాజు కూడా పర్యావరణంలో అంత త్వరగా కలిసిపోయేది కాదు కదా అని ప్రశ్నిస్తున్నారు.  ప్లాస్టిక్ కు ప్రత్యామ్నాయంగా రకరకాలో లోహాలను వాడితే వాటిని భూమినుండి బయటకు తీసుకురావడం కోసం గనులు తొలచవలసి ఉంటుందని, దానివలన పర్యావరణ హాని కలుగదా అని ప్రశ్నిస్తున్నారు. 

ఇప్పుడు క్రొత్తగా ఈ వ్యాక్స్ వామ్స్ అనేవి ప్లాస్టిక్ ని తింటాయని, ప్లాస్టిక్ వ్యర్థాలను అవి అదుపుచేయగలవని,  అందువలన ప్లాస్టిక్ కు వ్యతిరేకంగా ఉద్యమాలు చేయడం కూడదని, మిగిలిన పదార్థాలలాగానే ప్లాస్టిక్ ను కూడా స్వేచ్ఛగా, నిరభ్యంతరంగా ఇకమీదట ఉత్పత్తి చేయవచ్చునని వారు వాదిస్తున్నారు.

అసలు ఏమిటి ఈ వ్యాక్స్ వామ్స్?

ఇది చిమ్మట (moth) జాతికి చెందినది.  దీని జీవితచక్రం సీతాకోకచిలుక లాగానే, గుడ్డు - లార్వా - కకూన్ - రెక్కల పురుగు అనే దశలలో గడుస్తుంది. 

వీటిని మనం మైనం తినే పురుగులు అని వ్యవహరించవచ్చు.  తేనెటీగలు తన గూడును మైనంతో నిర్మించుకుంటాయి.  ఆ మైనం కూడా పాలిమర్ అని ప్లాస్టిక్ తరగతికి చెందినది.   ఈ వ్యాక్స్ వామ్స్ అని పిలువబడుతున్న పురుగులు ఆ మైనాన్ని తిని బ్రతుకుతాయి. 

అందువల్ల ఆ పురుగులు ప్లాస్టిక్ ను కూడా తినగలవా అని కోణంలో కొన్ని పరిశోధనలు జరిగాయి. 

 

ఫ్రెడరిక్ ఆ బెట్రోచ్చిని అనే శాస్త్రజ్ఞురాలి నాయకత్వంలో ఈ విధమైన పరిశోధనలు జరిగాయి.  ఆమె స్పెయిన్ దేశస్థురాలు.  యూనివర్సిటీ ఆఫ్ కాంటబ్రియాలో జీవశాస్త్రజ్ఞురాలు. 

అయితే ఈ పరిశోధనకు బీజభూతమైన సంఘటన ప్రయత్నపూర్వకంగా కాకుండా, ఆకస్మికంగా జరిగింది.  ఆమె తన తోటలో తేనె వ్యవసాయం చేస్తుంది.  ఒకసారి ఆమె తోటలోని తేనెగూడులలో ఉన్న కొన్ని మైనం పురుగులను తీసి ఒక ప్లాస్టిక్ సంచి మీద పెట్టడం జరిగింది.  ఒక గంట తరువాత చూస్తే ఆ ప్లాస్టిక్ సంచులకు రంధ్రాలు ఉన్నాయట. 

మనమైతే ఎందుకలా రంధ్రాలు పడ్డాయి అనే విషయాన్ని పెద్దగా పట్టించుకోము.  ఎందువల్లనంటే మన దృష్టిలో ప్లాస్టిక్ ఒక వ్యర్థపదార్థం.  దానిని వాడుకోవడం పూర్తి అయిన తర్వాత దానిని మనం ఒక చెత్త బుట్టలో నిర్లక్ష్యంగా విసిరేస్తాం.  అంతే.  దానికి రంధ్రాలు పడినా, పడకపోయినా మనకు అనవసరం.  అసలు దానిని మనం పట్టించుకోం.  మన దృష్టి అంతవరకే. 

అయితే బెట్రోచ్చిని జీవశాస్త్రజ్ఞురాలు.  ఆమెది పరిశోధనాదృష్టి.  హఠాత్తుగా ప్లాస్టిక్ కు ఎందువల్ల కన్నాలు పడ్డాయి అనే కోణంలో ఆమె ఆలోచన చేసింది.  మైనం పురుగు లార్వా ప్లాస్టిక్ ను తినడం వల్ల ఈ విధమైన రంధ్రాలు ఏర్పడ్డాయి అని ఆమె తెలుసుకున్నది.  ఆమె ఆనందానికి అవధులు లేకుండా పోయాయి.  ప్లాస్టిక్ ను తినే పురుగులు ఉన్నాయి అని ఆమె ఆ విధంగా కనుగొన్నది.

అప్పుడు ఆమె తన తోటి శాస్త్రజ్ఞులు అయిన బొంబెల్లి, క్రిస్టఫర్ హొయెలతో కలసి మరింత జాగ్రత్తగా ఈ విషయాన్ని పరిశీలించడం మొదలు పెట్టింది. 

వారు నూరు మైనం పురుగులను వారు ఒక పాలితిన్ ప్లాస్టిక్ బ్యాగు మీద వదిలిపెట్టారు.  తెల్లవారేలోగా ఆ పురుగులన్నీ కలసి 92 మిల్లీగ్రాముల ప్లాస్టిక్ ను తినేశాయి.  పరిశోధన మరింత ముందుకు సాగింది.

కేవలం బ్రతికి ఉన్న పురుగులు మాత్రమే ప్లాస్టిక్ ను తినడం ద్వారా ప్లాస్టిక్ ను నాశనం చేయగలవా లేక ఆ పురుగుల శరీరగతకణాలు కూడా ప్లాస్టిక్ ను నాశనం చేయగలవా అనే కోణంలో కూడా వారు పరిశోధనలు చేశారు.  వారి పరిశోధన విజయవంతమైంది.  చనిపోయిన పురుగుల అవశేషాలను కూడా ప్లాస్టిక్ మీద ఉంచితే ఆ ప్లాస్టిక్ నశిస్తుంది అని వారు తెలుసుకున్నారు.  కాలుష్యంతో కునారిల్లిపోతున్న ప్రపంచానికి ఇది ఎంతో శుభవార్త. 

ఆ మైనం పురుగులలోని ఎంజైములు ప్లాస్టిక్ పదార్థమైన polyethylene ను ethylene glycol అనే రసాయనపదార్థంగా మారుస్తున్నాయి అట.  ఆ రసాయనపదార్థాన్ని ఒక వస్తువు గడ్డకట్టకుండా వాడుతుంటారు.    (హిమాలయాలలో ఉండే మన సైనికులకు ఈ రసాయన పదార్థం చక్కగా ఉపయోగపడుతుంది కదా?)

ఆ ఎంజైములు ఏమిటో, వాటి స్వభావం ఎటువంటిదో తెలుసుకుంటే ఆ ఎంజైములు కేవలం మైనం పురుగులలో మాత్రమే లభిస్తాయా లేక ఇతరత్రా కూడా లభిస్తాయా అనే విషయం అర్థం చేసుకోవచ్చు.  తద్వారా వాటిని తగిన మొత్తంలో ఉత్పత్తి చేయడం ద్వారా త్వరగా పర్యావరణంలో కలిసిపోయే విధంగా ప్లాస్టిక్ ను తయారు చేయవచ్చు అని ఆశిస్తున్నారు.

స్టాన్ఫర్డ్ యూనివర్సిటీ శాస్త్రజ్ఞులు కూడా వేరొక రకమయిన బ్యాక్టీరియా  ethylene terepthalate  అనే ప్లాస్టిక్ ను నాశనం చేయగలవని కనుగొన్నారట.

ఈ విధంగా ప్లాస్టిక్ ను నాశనం చేయగలిగిన అటువంటి పురుగులు కీటకాలు మనకు తెలియనివి ఇంకా చాలా ఉండవచ్చునని, ఇంకా చాలా పరిశోధనలు జరగవలసి ఉంది అని శాస్త్రజ్ఞులు అంటున్నారు.

అయితే ఒక పదార్థం నాశనం కావడం అనేది నిజానికి జరగదు.  అది వేరొక పదార్థంగా మార్చబడుతుంది.  అంతే.  అందువలన, ప్లాస్టిక్ నాశనమై వేరొక పదార్థంగా మారినప్పుడు అది మానవాళికి, అనేక జీవరాసులతో కూడిన పర్యావరణానికి ఎంతవరకు హాని కలగకుండా ఉంటుంది అనే దానిని బట్టి ఈ పరిశోధనలు ముందుకు సాగుతాయి.   మనకు ఒక పరిష్కారమార్గాన్ని సూచిస్తాయి.  ఆయా బ్యాక్టీరియా ప్లాస్టిక్ నుంచి ప్లాస్టిక్ కంటే మరింత ప్రమాదకరమైన పదార్థాన్ని ఉత్పత్తి చేస్తే మనం పెనం నుంచి పొయ్యిలోకి పడ్డట్టే.  అటువంటప్పుడు ఆ పరిశోధనలు ఇక ముందుకు సాగవు.  పైపెచ్చు ఆ బ్యాక్టీరియా ప్లాస్టిక్ జోలికి పోకుండా కాపాడుకోవలసిన ఎటువంటి బాధ్యత కూడా మన మీదే ఉంటుంది. 

అంతే కాదు, ఈ మైనం పురుగులు ప్లాస్టిక్ ను నాశనం చేస్తాయి ఆ విధంగా మనకు ఉపకారం చేస్తాయి అనే దృష్టితో మనం ఈ పురుగులను ఇబ్బడి ముబ్బడిగా ఉత్పత్తి చేయడానికి పూనుకుంటే, కాలక్రమేణ అవి ప్రపంచంలో ఉండే ప్లాస్టిక్ మొత్తాన్ని తినేసి సంఖ్యాపరంగా చివరకు మనుషులకు ప్రమాదాన్ని కలిగించే స్థాయికి చేరుకుంటాయి అని భయం కూడా కలగవచ్చు. 

అయితే ఆ భయం అవసరం లేదు.  ఎందువల్లనంటే ఈ పురుగులకు లెక్కలేనన్ని పక్షులు సహజశత్రువులు.  (అంటే రకరకాల పక్షులకు ఇవి సహజమైన ఆహారం.)  ఈ పురుగులను చేపలు పట్టే గేలానికి ఎరగా  వాడుతూ ఉంటారు.  పైగా ఇవి మంచి ప్రోటీన్లు కలిగి ఉంటాయట. అందువల్ల కొన్ని దేశాలలో వీటిని వేయించి బొరుగులు తిన్నట్టు తింటూ ఉంటారట. 

ప్రస్తుతం ప్రపంచంలో సంవత్సరానికి 300 మిలియన్ టన్నుల ప్లాస్టిక్ వ్యర్థంగా భూమిని ఆక్రమించుకుంటూ ఉంది.  8 మిలియన్ టన్నుల వ్యర్థమైన ప్లాస్టిక్ సముద్రాలలో కలుస్తూ ఉంది. 

మనం తినే తిండిలోను, మనం పీల్చేగాలిలోను కూడా మైక్రో ప్లాస్టిక్స్ ఉన్నాయని, అవి క్రమక్రమంగా మన శరీరంలో ప్రవేశిస్తున్నాయని శాస్త్రజ్ఞులు హెచ్చరిస్తున్నారు.  అందువలన మనుషులలో పునరుత్పత్తిసామర్థ్యం తగ్గిపోతుందని, స్థూలకాయం పెరిగిపోతుందని, గుండె జబ్బులు అధికమవుతాయని, పిల్లల్లో ఎదుగుదల సమస్య ఏర్పడుతుందని చెబుతున్నారు.

అందువల్ల, ప్లాస్టిక్ ను నాశనం చేసే ఇటువంటి మైనం పురుగులు, వాటిలో ఉండే ఎంజైములు, అటువంటి బ్యాక్టీరియా మనిషికి మిత్రులు.  మనం మిత్రులను కాపాడితే ఆ మిత్రులు మనలను కాపాడగలవు.

ధర్మో రక్షతి రక్షితః.

ప్లాస్టిక్ సంచులు వద్దు అని ఎందుకు చెప్పాలి?

ప్లాస్టిక్ సంచులు వద్దు అని ఎందుకు చెప్పాలి?

*శిలాజ ఇంధనాల నుండి తయారవుతుంది.
*పర్యావరణ కాలుష్యానికి కారణమౌతుంది.
*పర్యావరణంలో కలిసిపోయి సమస్యాత్మకంగా తయారౌతుంది.
*వన్యప్రాణులను చంపుతుంది.
*మనుషుల ఆరోగ్యానికి హానికరం.
*రీసైకిల్ చేయడం అంత సులభం కాదు.
*శుభ్రపరచడానికి అధిక ఖర్చులు.
*మంచి ప్రత్యామ్నాయాలు అందుబాటులో ఉన్నాయి.

ప్లాస్టిక్ సంచులు మనకు మరియు పర్యావరణానికి ఎందుకు చెడ్డవి?

*ప్లాస్టిక్ సంచులు మన భూమిని, నీటిని కలుషితం చేస్తాయి. ప్లాస్టిక్ సంచులు ప్రతిచోటా ఉన్నాయి. చుట్టూ చూడండి. ప్లాస్టిక్ సంచులు చాలా సాధారణమైన చెత్త అని మీరు గమనించవచ్చు. రోడ్ల వెంట చెట్లు మరియు కంచెలలో చిక్కుకొని, నీటిలో తేలుతూ, పార్కుల్లో, అడవుల్లో కూడా నేలమీద పడి ఉంటుంది. చెత్త డబ్బాల చుట్టూ, ఉంటుంది. చాలా తేలికైనవి కాబట్టి, ప్లాస్టిక్ సంచులు గాలిలో తేలికగా కొట్టుకుపోతాయి. గాలి ద్వారా నీటి ద్వారా ఎక్కువ దూరం ప్రయాణిస్తాయి. ప్రకృతిని కలుషితం చేస్తాయి.  

ప్లాస్టిక్ చెత్త అన్ని ప్రాంతాల్లో కూడా గొప్ప సమస్యలను కలిగిస్తుంది. పారవేసిన లక్షలాది ప్లాస్టిక్ సంచులు పట్టణ ప్రాంతాల్లో నీటి పారుదల మార్గాలు మరియు మురుగునీటిని మూసివేస్తాయి. వర్షాలు ప్రారంభమైనప్పుడు, మొదటి కొన్ని నిమిషాల తర్వాత వీధులు నీటితో నిండిపోతాయి. ఎందుకంటే ప్లాస్టిక్ అడ్డు తగలడం వల్ల నీరు మురుగునీటి పైపుల గుండా వెళ్ళదు.

నదులన్నీ ప్లాస్టిక్ వ్యర్థాలతో నిండి ఉన్నాయి,
ప్రపంచంలోని కొన్ని నదులపై దాదాపు మీ పాదాలు తడి కాకుండా మీరు నడవగలరు.

ప్లాస్టిక్ సంచులు సహజవాతావరణాన్ని మార్చివేయగల స్థితికి చేరుకున్నాయి.

మనం ప్రతిచోటా ప్లాస్టిక్ బ్యాగులు అవసరం లేదని చెప్పవలసి ఉంది. ఇది మన పర్యావరణానికి, మన ఆరోగ్యానికి, ప్రపంచవాతావరణానికి మంచిది. స్టోర్ చెక్ అవుట్ వద్ద ప్రతిసారీ మనము ప్లాస్టిక్ కిరాణా సంచులు వద్దని చెప్పేందుకు ప్రయత్నం చేద్దాం.

ముడి చమురును శుద్ధి చేసేటప్పుడు బయటపడే పదార్థంతోను, సహజ వాయువు ప్రాసెసింగ్ నుండి తీసుకోబడిన పాలిథిలిన్ అనే పదార్ధంతో ఎక్కువ భాగం ప్లాస్టిక్ సంచులను తయారు చేస్తారు. వాటి వెలికితీసేటపుడు అవి గ్రీన్హౌస్ వాయువులను విడుదల చేస్తాయి, ఇవి ప్రపంచంలో వాతావరణంలో తీవ్రమైన మార్పులకు కారణమౌతాయి.

ఈ సంచుల ఉత్పత్తికి చాలా శక్తి (energy) అవసరం. ప్రపంచవ్యాప్తంగా, మన ప్రస్తుత చమురు సరఫరాలో 8 నుండి 10 శాతం ప్లాస్టిక్ బ్యాగ్ తయారీకి వెళుతుంది. కేవలం అమెరికాలో మాత్రమే, ప్రతి సంవత్సరం 12 మిలియన్ బారెల్స్ చమురును ప్లాస్టిక్ ఉత్పత్తికి వినియోగిస్తారు. ఖచ్చితంగా చెప్పాలంటే అమెరికాలో ప్రతి సంవత్సరం 100 బిలియన్ల ప్లాస్టిక్ సంచులు తయారవుతున్నాయి. ఇంతటి శక్తిని వెచ్చించి తయారు చేసినప్పటికీ, ప్రపంచవ్యాప్తంగా, ప్లాస్టిక్ సంచిని కేవలం 12 నిమిషాలు మాత్రమే ఉపయోగించుకుంటున్నారని ఒక అంచనా.

ప్రపంచ చమురు నిల్వలు 2050 వరకు మాత్రమే మన అవసరాలను తీర్చడానికి తగినంతగా ఉన్నాయి.

ప్లాస్టిక్ సంచులు ఎప్పుడూ విచ్ఛిన్నం కావు. పెట్రోలియం నుండి ఉత్పత్తి అయ్యే ప్లాస్టిక్ సంచులు సింథటిక్ పాలిమర్‌లతో కూడి ఉంటాయి, ఇవి ప్రకృతిలో కలిసిపోయేందుకు 1,000 సంవత్సరాల వరకు పట్టవచ్చు. చాలా సందర్భాలలో ఏమి జరుగుతుందంటే, వాతావరణంలో ఉన్నప్పుడు, అ ప్లాస్టిక్ చిన్న మైక్రోస్కోపిక్ ముక్కలుగా విడిపోతుంది, అవి నేలల్లో నిక్షిప్తం అవుతాయి. మనం ఆహారంలో కలిసి మన శరీరంలో ప్రవేశిస్తాయి. లేదా నీటిలో కలిసి కలుషితం చేస్తాయి.

ఈ ముక్కలు చాలా చిన్నవిగా ఉంటాయి, అవి మన కంటికి కనిపించవు.

ఆసియాఖండ దేశాలు, యుఎస్ తీరప్రాంతాలు పెద్ద మొత్తంలో ప్లాస్టిక్ వ్యర్థాలను సముద్రంలో విడుదల చేస్తాయి.

పర్యావరణంలో ఎప్పుడూ విచ్ఛిన్నం కాని కాలుష్య కారకాన్ని ప్రవేశపెట్టడం ద్వారా మన అంచనాలకు మించి చిక్కులు ఉంటాయి.

ఒక అధ్యయనం ప్రకారం, సముద్రతాబేలు మరణాలలో 35 శాతం వరకు ప్లాస్టిక్ తినడం వల్ల సంభవించాయి. ఒక చనిపోయిన పెలికాన్ కడుపు 17 ప్లాస్టిక్ సంచులతో నిండి ఉంది. 25 ప్లాస్టిక్ సంచులు కడుపు నింపడంతో ఆస్ట్రేలియాలో ఒక మొసలి మరణించింది. కడుపులో 8 ప్లాస్టిక్ సంచులు జీర్ణం కాకపోవడం వల్ల ఒక ఆవుదూడ బలవన్మరణానికి గురికావలసి వచ్చింది. ప్లాస్టిక్ ఉత్పత్తిని మానకపోతే, ప్లాస్టిక్ వినియోగాన్ని మానకపోతే, ప్రతిరోజు ఇటువంటి అనారోగ్యకరమైన సమాచారాన్ని మనం మరింత ఎక్కువగా వినవలసి ఉంటుంది.

ఇవన్నీ మనిషికి ముందస్తు సూచనలు. మనిషి తొందరపడి మేల్కొనకపోతే మనిషి కంచం నిండా కూడా తినడానికి ప్లాస్టిక్ వస్తువులే మిగులుతాయి.

మనం వినియోగించే ప్లాస్టిక్ ఈ జంతువుల జీర్ణవ్యవస్థను పాడు చేస్తుంది. పేగులలో చిక్కుబడుతుంది. ఊపిరి ఆడకుండా చేస్తుంది. హృదయవిదారకమైన విషయం ఏమిటంటే, ఆ జంతువులకు ఈ ప్లాస్టిక్ అంటరాని వస్తువని తెలియదు. తినకూడని పదార్ధమని తెలియదు.

ఈ ప్లాస్టిక్ వ్యర్థంలో జంతువులు కూడా సులభంగా చిక్కుకుపోతాయి. ప్లాస్టిక్ సంచులలో పక్షులు పట్టుబడి, ఎగరడానికి చేతకాక, ఆహారం తినలేక చివరికి గొంతు కోసుకుని పోయి చనిపోయిన సందర్భాలు చాలా ఉన్నాయి.

డాల్ఫిన్లు, సీల్స్, పిల్లులు, కుక్కలు, జింకలు, ఇంకా అనేక ఇతర జంతువులను ప్లాస్టిక్ చంపేస్తోంది.
ఈ జంతువుల బాధలను ఊహించుకోండి.

ఆసియా-పసిఫిక్‌లోని పగడపు దిబ్బలపై ఒక అధ్యయనం జరిగింది. పేరుకుపోయిన ప్లాస్టిక్ వ్యర్థాలు మొత్తం పగడపు దిబ్బలను క్రమంగా నాశనం చేసే అంటువ్యాధుల వ్యాప్తిని ప్రోత్సహిస్తాయని నిర్ధారించింది.

ఈ విధంగా, ప్లాస్టిక్ వ్యర్థాలు భూమిపై అపారమైన జీవవైవిధ్యం కలిగిన పర్యావరణ వ్యవస్థల నాశనాన్ని వేగవంతం చేస్తాయి.

కోకాకోలా వంటి శీతల పానీయాలలో, పంపు నీటిలో, సీఫుడ్‌లో కూడా మైక్రోప్లాస్టిక్స్ కనుగొనబడ్డాయి.

ఇది మన ఆహారపు గొలుసును (food chain) కలుషితం చేసింది, కనుక ఇది మన శరీరంలో కూడా చేరుకుంటోంది. మన శరీరంలోని ప్లాస్టిక్ కణాలు పెరిగిన సాంద్రతకు మన జీవక్రియ గతి తప్పుతోంది. సహజమైన రోగనిరోధక శక్తి క్షీణించి పోతోంది.

మన శరీరంలో వ్యాధికారక కణాలను ప్రవేశపెట్టడం ద్వారా ఇది కాలేయంపై ఒత్తిడిని పెంచుతుందని శాస్త్రజ్ఞుల అంచనా. దీనికితోడు, మన జీర్ణవ్యవస్థలోని ప్లాస్టిక్‌లు సరైన ఆరోగ్యాన్ని కాపాడుకోవడానికి అవసరమైన కొన్ని ముఖ్యమైన ట్రేస్ ఎలిమెంట్స్ (ఇనుము వంటివి) గ్రహించడాన్ని ప్రభావితం చేస్తాయి.

ప్లాస్టిక్ సంచులు ప్లాస్టిక్ ఉత్పత్తులు మొత్తంగా మన ఆరోగ్యానికి హానికరమైన పదార్థాలను కలిగి ఉంటాయి.

ప్లాస్టిక్ సంచుల రంగును మార్చడానికి జోడించే రంగులు కూడా మన ఆరోగ్యాన్ని దొంగిలిస్తాయి. ఈ రంగులు స్వయంగా విషాన్ని విడుదల చేస్తాయి. సీసం లేదా కాడ్మియం వంటి భారీ లోహాల కణాలతో కలుషితం చేస్తాయి, రెండూ మూత్రపిండాల ఆరోగ్యాన్ని, ఇతర అవయవాల పనితీరును దారుణంగా ప్రభావితం చేస్తాయి.

సముద్రంలో ప్లాస్టిక్ ముక్కలు, పిసిబిలు (పాలిక్లోరినేటెడ్ బైఫెనిల్స్) మరియు పిహెచ్ (పాలిసైక్లిక్ సుగంధ హైడ్రోకార్బన్లు) వంటి కాలుష్య కారకాలను సులభంగా గ్రహించగలవు. ఇవి హార్మోన్లను-భంగపరిచే రసాయనాలు.

ప్లాస్టిక్ సంచులను రీసైకిల్ చేయడం అంత సులభం కాదు.

ప్లాస్టిక్ సంచులు రీసైక్లింగ్ యంత్రాలలో చిక్కుకునే అవకాశం ఉన్నందున, ప్లాస్టిక్ సంచులను పూర్తిగా రీసైకిల్ చేసే సామర్థ్యం యంత్రాలకు లేదు. అందువల్ల అన్నిచోట్ల వాటిని అంగీకరించటం లేదు. వాటిని రీసైక్లింగ్ ప్రవాహం నుండి తొలగించడం వల్ల మునిసిపాలిటీలకు సంవత్సరానికి 1 మిలియన్లు ఖర్చవుతాయి.

ప్లాస్టిక్ బ్యాగ్ రీసైక్లింగ్‌కు ప్లాస్టిక్‌ను విచ్ఛిన్నం చేసి కొత్త ఉత్పత్తిగా మార్చగల ప్రత్యేక పరికరాలు అవసరం. కాని, చాలా మునిసిపాలిటీలకు వారి రీసైక్లింగ్‌ను తమ వ్యర్థ పదార్థాల నిర్వహణ కార్యక్రమంలో చేర్చడానికి బడ్జెట్ లేదు.

కాబట్టి, ప్లాస్టిక్ బ్యాగ్ రీసైక్లింగ్ సదుపాయాలు చాలా తక్కువగా ఉన్నాయి. రవాణా కూడా బాగా ఖరీదైనది.

ఫలితంగా, ప్రపంచవ్యాప్తంగా ప్లాస్టిక్ సంచుల యొక్క వాస్తవ రీసైక్లింగ్ రేటు 5% నుండి 15% శాతం మధ్య ఉంటుంది. #ఇంగ్లీష్‌మీడియం ఉన్నదనే కారణంగా గొప్పగా అభివృద్ధి చెందిన దేశంగా మనం భావిస్తున్న అమెరికాలో ఇది సంవత్సరానికి కేవలం 1% మాత్రమే.

{మూలం - జీరో ప్లాస్టిక్ కమ్యూనిటీ}